Valnefnd um umdæmisstjóra hefur lokið störfum og tilnefnt umdæmisstjóra ársins 2022 – 2023. Valið stóð milli margra hæfra Rótarýfélaga og var valnefnd því vandi á höndum. Ég þakka þeim einstaklingum fyrir að gefa kost á sér í starfið og vona að þeir muni allir skipa forystusveit Rótarý á Íslandi á komandi árum.
Að vandlega íhuguðu máli ákvað valnefnd samhljóða að leggja til við umdæmisstjóra að Bjarni Kr. Grímsson, viðskiptafræðingur og skrifstofustjóri Þjónustu- og þekkingarmiðstöðvar fyrir blinda, sjónskerta og einstaklinga með samþætta sjón- og heyrnarskerðingu, verði kjörinn umdæmisstjóri fyrir starfsárið 2022-2023. Bjarni er félagi í Rkl. Reykjavík – Grafarvogur. Eiginkona hans er Brynja V. Eggertsdóttir.
Bjarni er stofnfélagi í Rkl. Reykjavík – Grafarvogur og hefur gegnt ýmsum trúnaðarstörfum fyrir klúbbinn. Hann var áður félagi í Rkl. Ólafsfjarðar. Bjarni hefur einnig gegnt fjölmörgum öðrum trúnaðarstörfum m.a fyrir Kirkjugarða Reykjavíkurprófastsdæmanna og verið ötull í félagsmálum.
Með rótarýkveðju, Anna Stefánsdóttir, umdæmisstjóri 2019-2020.
