Félagar í Rótarýklúbbi Akureyrar vígðu hinn 1. júní sl. trjáhýsi sem þeir reistu til heiðurs elsta félaga klúbbsins, Hermanni Sigtryggssyni, í Botnsreit í Eyjafirði. Vefritið Akureyri net. sagði frá.
Botnsreitur er skógarreitur innan við Hrafnagil sem rótarýfélagar hafa ræktað í um 70 ár. Hermann hefur verið félagi í rótaryklúbbnum í 58 ár og verið afar ötull i skógræktinni eins og öðru sem hann hefur tekið sér fyrir hendur á farsælli ævi sinni, eins og einn rótarýfélaginn orðaði það við Akureyri.net.
Hermann hefur um áratugaskeið gengið með hugmynd að uppbyggingu á trjáhýsi í reitnum og ákváðu klúbbfélagar að láta hana verða að veruleika í tengslum við 90 ára afmæli Hermanns á síðasta ári.
Hagleikssmiðurinn Jón Björn Arason á veg og vanda að byggingunni en fékk dygga aðstoð frá rótarýfélögunum Ragnari Ásmundssyni og Ólafi Jakobssyni. Trjáhýsinu var gefið nafn við athöfnina – Hermannshöll skal hún heita.
Myndir: Guðmundur Baldvin Guðmundsson, Rkl. Akureyrar.
