Í gær fór fram formleg afhending á tölvubúnaði sem Rótarý á Íslandi hefur tekið þátt í að fjármagna í þágu félagsmiðstöðva í Chennai á Indlandi. Rotary Global Grants-sjóður alþjóðahreyfingar Rótarý studdi þetta samstarfsverkefni rótarýumdæma og klúbba á Íslandi og á Indlandi.
Ásdís Helga Bjarnadóttir, umdæmisstjóri, ávarpaði rótarýfundinn í Chennai og flutti kveðjur og árnaðaróskir frá umdæminu hér á landi auk þess sem hún greindi frá helstu verkefnum Rótarý á Íslandi.
Afhendingarathöfninni var sjónvarpað í streymi á Zoom, með þátttöku rótarýfólks og gesta í Chennai ásamt rótarýfélögum á Íslandi, sem fylgdust með á skjánum. Hófst hún kl. 13.00 að íslenskum tíma og stóð í 40 mínútur.
Bala Kamallakharan, félagi í Rkl. Reykjavík International, hlaut lof og sérstakar þakkir fyrir forgöngu hans um þetta samstarfsverkefni hér á landi og hlut klúbbs hans og íslenska rótarýumdæmisins í því.
Fjármögnun var með þeim hætti að Rótarý á Íslandi lagði fram 21.000 USD, Rótarýklúbbur Chennai 13.000 USD og mótframlag Rotary Global Grants sjóðsins nam 18.000 USD. Heiti verkefnisins á ensku er „Bridging the digital divide“. Tölvubúnaðurinn verður settur upp í þremur félagsmiðstöðvum í Chennai og mun nýtast um 500 börnum og unglingum, sem þær sækja að staðaldri.
